中航技術炒注資232

身版股場放大鏡：中航技術炒注資

大市雖然出現整固，但昨日股仔各自各精采，一到市靜，又係炒股仔嘅時候。中航技術（232）昨日股價上升10%，成交增至4300多萬元，股價在低位橫行多時之後有此表現，應係開展升浪前奏。
此股以往算係一隻悶股，去年中在0.60元附近徘徊有半年時間，其後跟隨大市回落至0.25元水平，雖然較高位跌嘅五成以上，但相對其他股仔，跌幅已經算細。

盈利質素不俗

中航技術憑藉母公司注資，去年業績大幅改善，今年初發出盈利預喜，結果在上月底公佈去年全年盈利增長62.6%至7799萬元，每股盈利1.73仙。不過扣除出售大廈外牆工程業務所獲收益3034萬元，實際盈利約為4764.8萬元，與06年度差不多。
將外牆工程業務出售之後，中航技術去年斥資1840萬元人民幣，向母公司增持四維航空29.4%權益至69.4%，藉以取得控股權，並進一步立足於航空測量服務及地理資訊系統（GIS）相關業務，而單是四維航空已為中航技術去年提供近3300萬元盈利，可說是主要盈利來源之一。市場不時傳出，母公司會再有航空相關資產注入。
作為中國航空技術進出口總公司系內上市公司，中航技術股價有時頗為跟隨系內航天控股（031）、中航科工（2357）及航科通信（1185），同系有得炒佢都會郁，有時卻又跟隨其他股仔起落，難得噚日航天系以及股仔都見炒味。要搵股炒，中航技術都諗得過，起碼盈利質素唔差兼有注資概念，好過有啲連年蝕錢嘅股仔。