富豪產業財息兼收

一周兩件：富豪產業財息兼收
錢雋
一周兩件
富豪產業（1881）呢隻REIT由上年4月上市以來，一路下滑，剛剛創出1年新低無耐，現價預測息率高達12厘，抵買。
上個月中，報載富豪旗下酒店，無論來房間收入，以至餐飲業收入，都錄到雙位數升幅。而隨住奧運馬術比賽來臨，沙田麗豪家陣亦已經接獲大量訂房。要咁睇，中港經濟表現繼續唔錯，加埋8月奧運效應，估計會帶挈香江旅遊業，富豪酒店收益仲有上升空間，08年度分派，肯定和味。
引述BNP預測，富豪REIT08年度，每基金單位分派，更加上到0.2元，即係現價（1.62元）息率回報12厘。買來坐定定收息，已經夠晒吸引。再講，唔計任何重秤，富豪REIT每基金單位NAV3.5元，現價折讓近54%，同類REIT當中，富豪REIT折讓，又係大得離譜。以翻半番做目標，富豪REIT見2.43元，仲有NAV折讓之餘，目標價預測息率仍然高企8厘水位。

泛海短打博升34%
泛海（129）香港仔新盤，呢期終於有聲氣，有報道話集團南灣御園（總樓面14萬平方呎）獲基金大孖沙大手洽購，而泛海意向呎價挨近1萬蚊。計計數，以樓面預期可銷樓面實收10億銀，50%純利率，一點唔過份，齋計呢個項目純利，上到5億銀，等於泛海每股4.6仙，現價（0.149元）PE得3倍幾。短打泛海，博上番2月高位0.2元，泛海潛在回報率34%，但09年度（3月底止）預期PE，仲係講緊得4倍幾。