慶鈴跌近「長城價」

一周兩件慶鈴汽車（1122）又快跌到落5年「長城」價，準備中線兜底。齋睇圖表，慶鈴5年半以，包括03年沙士慘淡期在內，收1蚊樓下月份，只得04年8月一次咁大把，集團每次調整，去到1蚊呢個長城價，就有支持，估計呢次都唔例外。
慶鈴NAV講緊上3蚊水平，上年底住近36億銀人仔現金，又無負債，每股淨現金講緊1.6元。慶鈴現價1.24元，仲低過每股淨現金值。
港股橫風橫雨，慶鈴呢類現金牛防風力有番咁上下。再講，呢期祖國貫徹節能減排政策，7月將會全面執行歐3排放法規，慶鈴商用車，食正呢條水，繼續支持08年度（12月底止）業績表現。慶鈴再跌，實1蚊兜底，就算博上番每股淨現金值1.6元，回報率講緊60%，非常吸引。

遠展防守力增強
遠東發展（035）年頭到家陣，跌近55%，日線圖14RSI，插到落20樓下，技術上睇，已經超賣。又集團08年半年度（9月底止），每股派息增加25%到5仙。就算08年度末期息，維持番07年度每股8仙水位，全年派息13仙，保守息率回報，都上到6厘。又若果遠展08年全年度派息，同樣keep住半年度25%增幅，講緊每股派息15仙，息率仲高達7厘。遠展防守力，正在增強。轉中短線，博遠展上番NAV2.9元，現價（2.05元）講緊要升41%，到時，遠展預期息率，仲係高企5厘水位。